கஷ்டப்படுபவர்களுக்கு உதவுங்கள்

* மனிதர்கள் பெண்ணாசையும், பணத்தாசையும் கொண்டவர்களாக இருக்கிறார்கள். 

இந்த எண்ணமே தீராத நோயாக அவர்களைப் பீடித்திருக்கிறது. 

இதிலிருந்து விடுபட நல்லவர்களோடு பழகுவது தான் சரியான தீர்வு.

* சிலருடைய உள்ளம் கல்சுவர் போல உறுதியாக இருக்கும். 

அதில் ஆணி அடித்தால் அது வளைந்து போகும். அதுபோல, 

எவ்வளவு முயன்றாலும் அவர்களுக்குள் ஆன்மிக விஷயம் எதுவும் உள்ளே போகாது.

* மக்களுள் பெரும்பாலோர் புகழுக்காகவோ, 

புண்ணியத்தைத் தேடுதல் பொருட்டோ பரோபகாரம் செய்கின்றனர். 

அத்தகைய சேவைகள் யாவும் சுயநலத்தை அடிப்படையாகக் கொண்டவை.

* பணம் அளவுக்கு அதிகமாக வைத்திருப்பவர்கள் தங்களுடைய செல்வத்தை

சுயநலத்தால் தனக்காகவே வைத்துக் கொண்டிருக்கக் கூடாது.

கஷ்டப்படுகிற ஜனங்களுக்கு உதவி புரிய வேண்டும்.

* மீன்கொத்திப்பறவை போன்று உலகத்தில் வாழ்ந்திருங்கள்.

அது நீருக்குள் மூழ்குகின்ற போது, சிறகுகளில் கொஞ்சம் நீர் ஒட்டிக் கொண்டிருக்கும் .

வெளியில் வந்து சிறகுகளைக் குலுக்கியதும் அந்த நீரும் அகன்றுவிடும். 

அதுபோல உலகியலில் ஈடுபட்டாலும் பற்றற்று இருக்கக் கற்றுக்கொள்ளுங்கள்.

-ராமகிருஷ்ணர்.